Boðið er upp á einstaklingsráðgjöf fyrir starfsfólk sem vill rýna í eigið starf og taka markviss skref til að efla árangur og ánægju í vinnunni.

Ef þú finnur fyrir álagi, ert að leita leiða til að auka ánægju í starfi eða vilt ná betri árangri, þá ertu á réttum stað. Markmiðið er að hjálpa þér að móta starf sem hentar þér betur og gefur þér meiri orku, tilgang og ánægju.

Ráðgjöfin er fyrir alla sem vilja stíga meðvitað skref í átt að betri líðan í starfi – hvort sem þú starfar sjálfstætt, ert stjórnandi, sérfræðingur eða hluti af stærra teymi. Það eina sem þarf er vilji til að skoða eigin stöðu og opna fyrir nýjar leiðir.

Nálgun mín byggir bæði á víðtækri reynslu úr atvinnulífinu og traustum fræðilegum grunni um vellíðan í starfi og starfsmótun (job crafting). Starfsmótun snýst um það sem þú getur sjálf/ur gert til að móta starfið þitt þannig að það styðji betur við styrkleika þína, áhuga og markmið. Með því að vinna markvisst með verkefni, samskipti og viðhorf er hægt að auka bæði ánægju og árangur í starfi.

Þú þarft ekki að skipta um starf til að bæta líðan í vinnunni – stundum þarf bara nýja sýn, skýrari fókus og rétt verkfæri.

Boðið er upp á fyrirlestra um vellíðan í starfi og starfsmótun. Fyrirlestrarnir henta stjórnendum og sérfræðingum, sem og almennu starfsfólki. Farið er yfir fræðin um vellíðan í starfi og starfsmótun þar sem áhersla er lögð á þá möguleika sem hver og einn hefur til að efla eigin vellíðan og árangur í starfi.

🌱 Næsta vinnustofa verður 19. maí, sjá nánar hér!

Á vinnustofunni er farið yfir helstu þætti í starfsumhverfinu sem hlúa að vellíðan. Einnig er ítarlega fjallað um starfsmótun, fræðin um það hvað hver og einn getur gert til að efla eigin starfsánægju. Skoðuð eru fjölmörg dæmi um starfsmótun og þátttakendur fá tækifæri til að rýna í eigið starf og taka fyrstu skrefin í átt að betri líðan í starfi.

Hér má lesa frétt um vinnustofu sem haldin var í Háskólanum á Akureyri

Námskeiðið er í boði hjá Símenntun Háskólans á Akureyri. 

Á námskeiðinu er fjallað um hvað felst í vellíðan í starfi, hvað það er sem dregur úr vellíðan og eykur líkur á kulnun í starfi. Jafnframt er farið yfir mikilvægi stuðnings í starfi sem meðal annars felst í góðu skipulagi og samskiptum. Auk þessa er rætt um áhrif þess að hafa hafa skýra ábyrgð í starfi sem og frelsi til athafna um hvernig verkin eru unnin og útfærð. Sagt er frá fjölmörgum raundæmum um hvernig starfsfólk hefur mótað störf sín til að bæta eigin líðan í starfi.

Námskeiðið stendur yfir í 3 vikur . Í upphafi hverrar viku fá nemendur aðgang að stuttum fræðsluerindum sem eru aðgengilegar á kennsluvef þegar hentar. Einu sinni í viku er sameiginlegur klukkustundar langur hittingur á Zoom þar sem efni fyrirlestranna er rætt og verkefni leyst til að finna praktískar leiðir til að nýta starfsmótun.

🌱 Næsta námskeið verður í boði í annað sinn haustið 2026.